سرطان القولون هو واحد من أكثر أنواع السرطانات شيوعاً بالعالم وبالعراق، خاصة عند الناس اللي أعمارهم فوگ الـ 50. الخبر الزين إنه يبدأ كـ "لحمية صغيرة" (Polyp) حميدة، وإذا اكتشفناها بالناظور وشلناها، نكون منعنا السرطان تماماً.
الأعراض (انتبه لأي تغيير)
في البداية، المرض ما يسوي أعراض، بس من يكبر تبدأ تظهر:
- دم بالخروج: سواء دم أحمر واضح أو خروج لونه أسود غامق.
- تغير مفاجئ بالخروج: يعني طول عمرك خروجك طبيعي، وفجأة صار عندك إسهال مستمر أو إمساك مستمر لأكثر من 3 أسابيع بدون سبب.
- ألم بالبطن ونفخة: ما تروح بالأدوية العادية.
- نزول وزن: ملابسك گامت توگع منك وأنت مدا تسوي ريجيم.
- فقر دم (أنيميا): تحس بتعب ودوخة، ويطلع عندك نقص حديد بالتحليل.
منو الأكثر عرضة للمرض؟
- العمر فوگ الـ 50 سنة.
- التدخين والسمنة.
- أكل اللحوم الحمراء والمصنعة (الصوصج والمرتديلا) بكثرة وقلة أكل الألياف.
- وجود تاريخ عائلي (أحد من أهلك صار عنده سرطان قولون).
الكشف المبكر (الناظور ينقذ حياتك)
أفضل طريقة للوقاية هي ناظور القولون (Colonoscopy). يُنصح أي شخص عمره عبر الـ 45 أو 50 يسوي ناظور فحص حتى لو ما عنده أعراض. الناظور يكشف اللحميات ويشيلها بنفس اللحظة قبل ما تتحول لمرض خبيث.