التشنج الحراري (Febrile Seizure) هو نوبة صرع مؤقتة تصير عند الأطفال بين عمر 6 أشهر و 5 سنوات بسبب الارتفاع السريع والمفاجئ بالحرارة. المنظر مخيف جداً للأهل، بس الخبر المطمئن إنه غير مؤذي للدماغ وما يعني إن الطفل عنده صرع.
شلون يصير التشنج؟
- الطفل يفقد الوعي وتغور عيونه.
- جسمه يتخشب أو يهتز (يرجف).
- ممكن يزبد حلقه أو يتبول على نفسه.
- النوبة تطول دقيقة أو دقيقتين (بس الأهل يحسوها دهر).
شسوي أثناء النوبة؟ (إسعافات أولية)
- لا تخافين: حافظي على هدوئج، النوبة راح توگف وحدها.
- الأمان: خلي الطفل على الگاع بمكان آمن، وبعدي عنه أي شي ممكن يضربه.
- الوضع الجانبي: قلبي الطفل على صفحته حتى لا يختنغ باللعاب أو الزواع.
- لا تخلين شي بحلقه: لا ملعقة ولا اصبعج، ولا تحاولين توقفين الرجفة بالقوة.
- حسبي الوقت، إذا طولت أكثر من 5 دقايق، اتصلي بالإسعاف فوراً.
بعد النوبة
الطفل راح يكون دايخ وينام، هذا طبيعي. راجعي الطبيب لمعرفة سبب الصخونة (التهاب لوزتين، أذن، الخ) وعلاجه.